Қазақстан Президенті Қасым-Жомарт Тоқаев пен Корея Республикасының Президенті Юн Сок Ёл Қазақстан-Корея бизнес форумына қатысты. Шараға қатысушыларды құттықтаған Мемлекет басшысы өз сөзінде екі ел арасындағы сауда-экономикалық ынтымақтастықтың ең перспективалы бағыттарымен таныстырды.
– Корея Республикасы – Қазақстанның бес ірі инвестициялық және сауда серіктестерінің бірі. Кореядан еліміздің экономикасына құйылған тікелей инвестиция көлемі он миллиард долларға жуықтап, өзара тауар айналымы алты миллиард долларға жетті. Бүгінгі таңда біздің нарықта 700-ден астам оңтүстіккореялық компаниялар, соның ішінде Hyundai, KIA, Samsung, LG, Doosan және басқа да жаһандық корпорациялар ұсынылған. Қазақстан Корея Республикасының Орталық Азия аймағындағы негізгі сауда-экономикалық серіктесі ретіндегі ұстанымын нығайтуға ниетті. Нақты жоспарлар әзірленді, келісімдерге қол қойылды, бұл елдеріміздің көп қырлы ынтымақтастығын дамытуға қосымша серпін беретіні сөзсіз», – деді Қасым-Жомарт Тоқаев.
Қазақстан басшысының айтуынша, ынтымақтастықты арттыру үшін, атап айтқанда, медицина, фармацевтика және биотехнология салаларында мүмкіндіктер ашылуда.
– Pfizer, Roche, GE Healthcare және Philips сияқты жаһандық ойыншылар елімізде дәрі-дәрмек пен медициналық құрал-жабдықтарды өндіруді локализациялауда. Жақында оңтүстіккореялық GL Rapha компаниясы Алматыда біздің нарықта жоғары талаптар қоя алатын биофармацевтикалық зауыттың құрылысын бастайды деп күтеміз. Біз елімізде оңтүстіккореялық диагностикалық орталықтар мен көпсалалы зертханаларды ашудың үлкен болашағын көріп отырмыз», - деді Мемлекет басшысы. Ол форум екі ел арасындағы күш-жігердің синергетикасы мен жемісті ынтымақтастығына жаңа серпін беретініне сенім білдірді.
«Бүгін мен K-Silk Road тұжырымдамасына толық қолдау білдірдім. Бұл шынымен де өте қызықты тұжырымдама. Қазақстан бұл бағдарламаны жүзеге асыру үшін қолдан келгеннің бәрін жасайды. Келесі жылы Президент мырза маған хабарлағандай, Кореяда осы тұжырымдама аясында саммит өткізу жоспарланып отыр. Біздің ел саммитке жоғары деңгейде қатысады деп ойлаймын. Қазақстан үкіметі оңтүстіккореялық компаниялар мен біздің елде жұмыс істеуге мүдделі инвесторларға барлық қажетті қолдауды көрсетеді», – деп түйіндеді сөзін Қасым-Жомарт Тоқаев.
Дереккөз: https://www.akorda.kz
